Performance de mùsica sarda e tecnologias noas

TUMBU

Est unu progetu annovadori cun arrèxinis fungudas.

Est un’intrari allirgu a s’arrichesa de su patrimòniu musicali traditzionali, chi bessit a bisioni poètica po mèdiu de is tecnologias noas.

Su repertòriu musicali traditzionali sonau in scena de Orlando Mascia e Eliseo Mascia, babbu e fillu, polistrumetistas de Maracalagonis, est giogau a ìnturu de una guarnissa digitali chi torrat a is ogus su chi su spetadori est ascurtendi. Una bisioni musicali chi ghetat su passau concas a su benidori. S’ispetàculu est istètiu fatu imperendi una tecnologia noa, sa pellìcula Hologauze chi ponit impari elementus virtualis e realidadi, donendi un’efetu modernu de “pepper ghost”.

S’identidadi est su Benidori!

 

19/20 dicembre 2019 Spazio DOMOSC

Regia e drammaturgia scènica: Ilaria Nina Zedda.

Regia tecnològica: Marco Quondamatteo

Is musicistus: Orlando Mascia ed Eliseo Mascia.

In scena: Monica Serra e Marisa Cau.

Cun s’agiudu de sa Truma creativu-digitali
Agiudu regia: Claudia Pupillo
Live Visual: Simone Murtas
Fònicu: Elvio Corona.

Consulèntzia scentìfica a incuru de s’etnomusicòlugu Marco Lutzu.
Produtzioni: DOMOSC-Domos de Sa Cultura.

Ispetàculu de poesia a bolu e tecnologias noas

POESIA AUMENTADA

Sa lìngua sarda, sa poesia a bolu traditzionali de sa Sardìnnia, e is tecnologias noas digitalis. Un’intrama chi podit scuncordari e annovari sa manera de fraigari poesia e tiatru in s’annu 2020.

“Poesia aumentada” est s’ispetàculu de poesia a bolu e tecnologias noas chi eus biu sàbudu 25 gennarxu a is 9 oras de a merie e domìnigu 26 a is 7 de a merie, in Casteddu in s’Ispàtziu DOMOSC – Domo de sa Cultura, bia Newton 12, Casteddu.

 

Cantadoris giòvunus ant portau a palcu Sa cantada, traditzioni trabballosa de poesia a bolu in lìngua sarda, po mèdiu de unu contu originali e digitali, chi fait acostiari sa genti a sa prus arta e fascinosa espressada de sa cultura sarda, una connoscèntzia antiga prena de istòria, valoris moralis, ironia e abilesa retòrica.

Cantari a bolu est un’arti trabballosa e fascinosa chi in diis de oi arriscat de isparèssiri. Acumpangiaus de sa ghitarra, is poetas chistionant s’unu cun s’àteru pesendindi mutetus, formas mètricas de sa traditzioni sarda scheta, arrexonendi de argumentus is prus diferentis po mèdiu de unu sistema de simbillàntzias e cubertantzas.

S’Ispetàculu “Poesia aumentada”  fait iscobèrriri torra a su spetadori sa cantada, faendiddi atobiari a is giòvunus poetas sardus, nàscius in s’era digitali, faci a pari cun is tecnologias noas.

 

25/26 Gennaio 2020, Spazio Domosc.

Ant pigau parti is poetas improvisadoris:
Simone Monni (Burcei)
Luca Panna (Cuartu Sant’Aleni)
A sa ghitarra: Mario Aledda (Burcei)

Regia e drammaturgia: Ilaria Nina Zedda
Regia tecnologias noas e luxis: Marco Quondamatteo

Truma creativu-digitali: Claudia Pupillo, Simone Murtas.

fònicu: Elvio Corona

Consulèntzia scientìfica a incuru de s’etnomusicòlugu Marco Lutzu.
Produtzioni: DOMOSC-Domos de Sa Cultura.