L’AQUILONE DI VIVIANA
Sa Cumpangia teatrali “L'Aquilone di Viviana” est nàscia in su 2000 in Casteddu. Fait atividadi cun is disciplinas artìsticas e creativas, pighendi pruschetotu su tiatru che aina po cuncordari progetus culturalis, creativus, identitàrius e sotzialis. Dda ghiant sa regista Ilaria Nina Zedda e su diretori tecnològicu Marco Quondamatteo. Promovit sa produtzioni e distributzioni de ispetàculus chi acàpiant medas disciplinas, po totu is fàscias de edadi, de eventus site specific, duncas acapiaus a su territòriu. De su 2014, a ìnturu de L'Aquilone di Viviana, est nàsciu su spin-off Kyber Teatro, cumpangia de tiatru e tecnologias noas chi aparìciat su Festival Internatzionali de Tiatru e Tecnologias Noas “Le meraviglie del possibile”, su primu festival natzionali de tiatru multi-mediali. L'Aquilone di Viviana dirigit su Spazio OSC, anca est nàscia sa DomOSC – Domo de sa Cultura – sa primu Domu de sa Cultura Sarda in Casteddu.
L'Aquilone di Viviana est DomOSC!
VIDEO GUM PRODUCTION
Sa Video Gum Production est unu sòtziu a responsabilidadi limitada chi fait produtzioni e post-produtzioni àudiu-visiva, servìtzius de arregistratzioni digitali live cun carrus-mòbilis, produtzioni e post-produtzioni digitali po àterus clientis. Su sòtziu podit assigurari una variedadi manna de servìtzius, imperendi duas postatzionis de regia mòbili: trumas piticas po fàiri arregistratzioni, ripresas po manifestatzonis e ispetàculus prus mannus e trabballosus, documentàrius e spot publicitàrius, de sa progetatzioni fintzas a sa produtzioni. Video Gum Production s'agatat in Casteddu, bia Newton 24.
Video Gum è DomOSC! Video Gum est DomOSC!
Mega Soc. Coop
Mega Soc..Coop est unu sienda cooperativa sotziali de tipu B chentza de iscopu de torracontu. Fait servìtzius po siendas pùblicas e privadas, in contu de amministratzioni, gestioni de call center, e fintzas comunicatzioni, relatzionis pùblicas e promotzioni.
In prus produsit ainas multimedialis e progetus gràficus.
In contu de atividadi culturali, sighit sa produtzioni, rapresentatzioni, organizatzioni, distributzioni e gestioni de eventus e ispetàculus de ònnia arratza, e puru s'assistèntzia tècnica e s'aparìciu.
Est ativa in sa circa e sperimentatzioni in campu formativu, didàticu e ri-creativu, in su campu de s'ispetàculu, isport e turismu.
S'agatat in Bia Newton, Casteddu.
Mega Soc..Coop est DOMOSC!
Marco Lutzu
Docenti de etnomusicologia in s'Universidadi de Casteddu, at fatu circas in su campu in is Caràibi e in Sardìnnia, ocupendisì de mùsica e religioni, anàlisi de sa performance, launeddas e poesia a bolu. Est s'autori e su responsàbili iscientìficu de s'Enciclopedia della Musica Sarda (ed. L'Unione Sarda).
Sighit sa parti iscientìfica, sterrit totu is documentus e fait su coordinamentu de is cantadoris e de is sonadoris chi pigant parti a is atividadis.